6. Najoqqutat
Pisortat aningaasaqarnerat pillugit kisitsisitigut paasissutissani najoqqutat assigiinngitsut Kalaallit Nunaanni pisortat aningaasaqarnerannik naatsorsuutit suliarineqarnerannut ataqatigiissaarneqarlutik atorneqarput. Najoqqutat pingaarnerit tassaapput kommunini naatsorsuutit, nunap karsiata naatsorsuutai aamma qallunaat ministeriaasa aningaasat atugaat Kalaallit Nunaanut attuumassutillit. Aamma suliffeqarfiit naatsorsuutaat atorneqarput. Kisitsisit paasissutissat pingaarnerit pigineqanngikkaangata ilanngussat atorneqartarput. Assersuutigalugu pigisanik nalilinnik atuinermik naatsorsuinermi.
2018-imi pisortat naatsorsuutaat pisortat ataatsimut kontoplaneqalernerisa kingunerisaannik allanngortinneqarput. Taamaalilluni piffissaq ungasinnerusoq eqqarsaatigalugu kommunit aamma Namminersorlutik Oqartussat assigiisaarnerusumik kontonut inissiisalissapput. Kommuneqarfimmit Sermersuummit januaarimi 2018-imi kontoplan tamanut atulersussaq atorneqalerpoq. 2019-imi Namminersorlutik Oqartussanit aamma Qeqqata Kommunianit atorneqalersoq. Kommunit sinnerisa 2020-mi 2021-milu kontoplan nutaaq atulerpaat.
Kontoplanip nutaap atulernera pisortat aningaasaataat pillugit kisitsisitigut paasissutissiornermut annertunerusumik sunniuteqartussaanngilaq. Taamaakkaluartorli Kommuneqarfiup Sermersuup aamma Qeqqata Kommuniata naatsorsuutaanik misissuinermi paasinarsivoq, kontoplanimi nutaammi itisiliinerit amerlanertigut annertusigaluartut ilaatigut annikillisimasut. Kontoplanimi itisiliinerit annikilleriarnerisa aningaasarsiorneq tunngavigalugu agguataarineq aamma suliaqarfinnut agguataarinerit sunnertarpaat. Ukiup nikinneranut allanngornerit ersarippallaarnavianngikkunarput. Kisianni naatsorsuutit tamarmik kontoplani ataaseq atorlugu suliarineqartalerpata tamanna kisitsisit nikeriarujussuarnissaat ersarinneruleratarsinnaavoq. Tamanna ingerlaavartumik Naatsorsueqqissaartarfimmit nalilersorneqartarumaarpoq.